A feira de autoedición Autobán celébrase o 15 e 16 de agosto na Coruña co patrocinio de PuntoGal

A Coruña, 4 de agosto de 2025 | Como parte do seu compromiso co apoio a iniciativas no ámbito da lingua e da cultura galega, PuntoGal continúa a apostar polas feiras de autoedición como proxectos de interese estratéxico. A súa colaboración nestes eventos contribúe a mellorar a súa estabilidade, profesionalización e capacidade de convocatoria, consolidándoos como espazos fundamentais de expresión creativa e cultural.

O verán de 2025 comezou, como é tradición, co FunFunFun, a veterana cita compostelá que se converteu nun escaparate de referencia para a ilustración, a banda deseñada, a música e a edición alternativa. Esta feira marcou o inicio dunha tempada chea de propostas culturais diversas, abertas e participativas.

En agosto chega a seguinte cita, o Autobán, que comparte datas co histórico festival Viñetas desde o Atlántico, na Coruña. Cun espírito libre e inclusivo, o Autobán desenvolverase os días 15 e 16 de agosto na rúa, nun ambiente festivo que invita á participación espontánea e ao encontro entre artistas e público. Esta feira consolidouse como un punto de referencia ineludible para os amantes da autoedición e da creación independente.

Variedade de produtos e actividades

No Autobán de 2025 repítese e actualízase unha formula que leva anos funcionando, con forte implicación de artistas locais, presenza de convidados doutras comunidades e países, e unha diversidade de propostas que abrangue desde os proxectos máis consolidados ata as primeiras experiencias creativas.

A oferta inclúe banda deseñada, roupa reciclada, cerámica, obxectos impresos en 3D, publicacións satíricas con formatos sorprendentes (como cadernos de caligrafía ou catálogos de mobles), parches, deseños para tatuaxes ou libros para colorear.

Premio ao Mellor Fanzine Galego

Unha das novidades do Autobán e Premio ao Mellor Fanzine Galego, un recoñecemento que busca visibilizar e valorizar o traballo autoeditado feito en galego. Este galardón pon en primeiro plano a creatividade, a identidade e o esforzo das persoas creadoras que apostan pola lingua galega como vehículo de expresión artística e editorial. A elección da obra gañadora faise a través dun xurado composto por profesionais do sector, e o premio consolídase como un estímulo máis á creación e á visibilidade da autoedición en Galicia.

Unha cita para seguir de preto

O Autobán continúa medrando como evento referente para a autoedición en Galicia, cun modelo que aposta pola diversidade, a accesibilidade e a colaboración entre sectores culturais. Para seguir todas as novidades e coñecer o programa definitivo de actividades, recoméndase estar atentos ás redes sociais da feira e á súa páxina web: autoban.gal.