Santiago de Compostela, 16 de decembro de 2022.- PuntoGal renovou o convenio de colaboración coa Irmandade dos Apañacastañas, entidade que fomenta a figura do Apalpador do Nadal Galego. O dominio acompaña a esta iniciativa nos últimos anos facilitándolle o dominio e dándolle difusión ás súas actividades.
En www.apalpador.gal cóntase que esta é unha personaxe mítica galega que baixa polo Nadal a levarlles os agasallos ás nenas e nenos. Entra de noite nos seus cuartos cando están a durmir e apálpalles a barriguiña por ver se xantaron abondo e déixalles, ademais dos xoguetes, unha presa de castañas.
A páxina web non só presenta á figura do Apalpador, senon doutras figuras semellantes que existen noutras culturas, o que nos achega ao mundo fascinante do imaxinario destas datas.
Na páxina pódese desfrutar de diferentes recursos para coñecer mellor todo o relacionado co Apalpador e con esta época do ano: ligazóns, material didáctico, publicacións, experiencias prácticas e tamén algo de imaxinación. Na lapela de recursos hai láminas, cadernos e outros materiais útiles para que aqueles que queiran difundir a figura do Apalpador nos seus centros, bibliotecas ou calquera outro espazo o teñan máis sinxelo, mesmo presentándonos persoas que están a difundir a figura do Apalpador e da Apalpadora dunha forma máis directa, como son André Espiñeira, Antía Vázquez, Anxo Moure, e un longo etcétera que podedes consultar aquí.
PuntoGal, que xa supera os 6.700 dominios rexistrados, segue traballando para que todas aquelas persoas, asociacións, institucións e empresas que queiran visibilizarse na rede como parte da comunidade galega poidan facelo cun prezo competitivo. O dominio continúa co seu programa corporativo de apoio a iniciativas relacionadas coa lingua, a cultura e as TIC en Galicia. Entre as últimas actividades realizadas figura o patrocinio dos VII Premios Paraugas ou os VI Permios Spin-Off PuntoGal.
E, como non pode ser doutro xeito, o equipo do dominio quere aproveitar esta ocasión para desexarvos un Bo Nadal.
Máis información en www.dominio.gal ou no 670226268.